Páginas vistas en total

viernes, 11 de abril de 2008

Localizan máis dun cento de útiles paleolíticos na comarca de Lemos

roi fernández
O achado dun novo xacemento en Ribas Altas súmase ás descobertadas realizadas desde o pasado venres
Autor:
Francisco Albo
11/4/2008
A primeira semana de actividade da terceira campaña anual de investigación dos xacementos paleolíticos do sur lucense, coordinada pola Universidade de Santiago, termina con notables resultados. A pesar das condicións meteorolóxicas adversas, os investigadores recolleron desde o pasado venres máis dun centenar de artefactos de diversas épocas prehistóricas en diferentes puntos do Saviñao e Monforte e descubriron dous novos xacementos en zonas non estudadas ata agora.
A máis recente destas descubertas realizouse o mércores cerca do núcleo de Outeiriño, na parroquia monfortina de Ribas Altas. Na primeira xornada de prospección feita este ano para localizar ferramentas prehistóricas na superficie do terreo, o equipo científico encontrou neste lugar unhas quince pezas de grande formato que, segundo os arqueólogos, poderían encadrarse no período achelense, unha etapa do Paleolítico inferior que transcorreu hai entre 500.000 e 300.000 anos. Non obstante, en canto á idade destes artefactos -como sucede con todos os que aparecen en superficie- só pode facerse unha estimación moi aproximada baseándose no seu aspecto. Nesta zona non se fixera anteriormente ningún achado deste tipo, polo que acaba de abrirse unha nova área onde poderían aparecer máis restos arqueolóxicos.
Por outro lado, as prospeccións superficiais serviron ademais para encontrar un conxunto de numerosas pezas de pequeno tamaño na parroquia de Valverde, tamén en Monforte, onde o ano pasado xa se localizara un importante xacemento en superficie. As pezas parecen neste caso moito máis modernas que as de Outeiriño, xa en que principio poderían pertencer ao Paleolítico superior, unha etapa situada entre os 35.000 e os 10.000 anos antes da nosa era.
Estes achados súmanse á descoberta -da que xa se informou anteriormente- dun xacemento na aldea de Pedras, no municipio do Saviñao, outro lugar que se estuda por primeira vez. Neste caso, as pezas apareceron enterradas, o que pode facilitar moito a súa datación. O equipo arqueóloxico espera que mellore o tempo para continuar as escavacións emprendidas en Pedras, as primeiras que se realizan ao aire libre desde que comezou a desenvolverse este proxecto.
Tomado de: http://www.lavozdegalicia.es/lemos/2008/04/11/0003_6723708.htm

No hay comentarios:

Publicar un comentario