Páginas vistas en total

jueves, 1 de mayo de 2008

Lume prehistórico baixo a auga

...............................................alberto lópez

A escavación arqueolóxica realizada no Saviñao proporcionou novas descubertas a pesar das difíciles condicións en que se desenvolveron os traballos
Autor:
Francisco Albo
29/4/2008

A actual campaña de investigación dos xacementos paleolíticos da comarca de Lemos, que rematará esta semana, segue proporcionando notables resultados a pesar dos atrancos meteorolóxicos. Nos últimos días, os arqueólogos acharon novos materiais na escavación realizada nunha finca da aldea de Pedras, no Saviñao, e localizaron máis artefactos dispersos na superficie do terreo en diferentes puntos do municipio de Monforte.
Os traballos de Pedras, que se deron por concluídos a pasada fin de semana, leváronse a cabo en medio de importantes dificultades. A fosa cavada polo equipo de investigación alagouse varias veces a causa da chuvia e da subida do nivel freático, e tivo que ser drenada repetidamente con baldes e cunha bomba de auga. Con todo, no lugar apareceron media ducia de útiles prehistóricos que se suman aos que se encontraran antes nesa escavación, así como restos de madeira carboniada que talvez procedan de antigas fogueiras. «O que pretendíamos era profundizar un pouco máis na sondaxe antes de terminar esta campaña para ver se aparecían máis materiais e o resultado foi positivo», explica o coordinador destes traballos, o arqueólogo Arturo de Lombera. «Chegamos máis ou menos a 1,80 metros de profundidade e aínda non tocamos a rocha nai, polo que é bastante posible que por debaixo haxa máis camadas de terra e máis material arqueolóxico sepultado», engade.
En vista deste resultado, os investigadores xa teñen previsto realizar máis escavacións en Pedras en futuras campañas, nas que se espera que as condicións meteorolóxicas se presenten máis favorables que nesta ocasión.
Por outro lado, nas prospeccións en superficie encontráronse novas mostras de industrias paleolíticas nas parroquias monfortinas de Seoane, Tor, Moreda e Baamorto. O equipo ten previsto realizar hoxe máis prospeccións na zona sur do municipio, nos límites con Sober, e mañá darase por terminada esta campaña.
O proxecto científico que coordina a Universidade de Santiago seguirá desenvolvéndose nos meses de verán, pero entón os escenarios das sondaxes e das prospeccións estarán nas covas de Becerreá e do Courel, onde xa se rexistraron importantes descubertas o ano pasado. Os traballos arqueolóxicos na depresión de Lemos proseguirán o ano próximo.
Actividades divulgativas
En Monforte, por outro lado, levaranse a cabo axiña as primeiras actividades divulgativas dirixidas ao público en xeral que se encadran neste proxecto científico. Por unha parte, na cidade presentarase unha exposición didáctica que se está terminando de preparar estes días na que se explicarán de forma sinxela as investigacións sobre o Paleolítico realizadas desde a primavera do 2006 nas comarcas de Lemos, Quiroga e Os Ancares. Con este mesmo obxectivo ofreceranse unhas conferencias.
Estas actividades non teñen aínda unha data fixada, pero os responsables esperan que poidan realizarse a partir de mediados de maio. «Gustaríanos explicar tamén as investigacións que estamos terminando agora mesmo, non só as dos dous últimos anos, e para iso necesitamos un pouco de tempo», sinala De Lombera.
Tomado de: http://www.lavozdegalicia.es/lugo/2008/04/29/0003_6774438.htm

----------------- X ------------------

Restos de madeira carbonizada que acompañan útiles do Paleolítico inferior

Na escavación de Pedras, os investigadores encontraron restos de madeira queimada en todos os niveis da sondaxe, algúns dos cales estaban xunto ás ferramentas que foron desenterradas no lugar. A análise radiométrica destes residuos orgánicos -mediante o célebre método do carbono 14- podería axudar aos científicos a determinar a idade do xacemento, pero só dunha forma aproximada.
Arturo de Lombera recorda a este respecto que o carbono 14 só serve para datar con exactitude os restos orgánicos que teñen unha antigüidade de ata 50.000 anos aproximadamente. Cando os residuos son máis antigos, a análise radiocarbónica só vale para saber que superan efectivamente esa idade, pero non para datalos con máis exactitude. Por exemplo, non indica se teñen 70.000 ou 200.000 anos. «O problema é que os artefactos que apareceron xunto as eses carbóns teñen seguramente bastante máis de 50.000 anos, xa que a súa tipololoxía indica que foron fabricados no Paleolítico Inferior», explica o arqueólogo. Non obstante, esta análise pode servir para que os científicos averigüen a idade da formación das camadas de terreo na zona, o que axudaría a precisar mellor a antigüidade do xacemento.

Tomado de: http://www.lavozdegalicia.es/lemos/2008/04/29/0003_6774135.htm

-------------- X ---------------

Resultados prometedores das escavacións de Pedras
1/5/2008

Un dos achados de maior interese da campaña recén terminada foi o que se levou a cabo na primeira escavación ao aire libre realizada dentro deste amplo proxecto de investigación, que tivo por escenario a aldea de Pedras, no municipio do Saviñao. Pese ás condicións adversas en que efectuou o traballo a causa das chuvias das últimas semanas, os investigadores puideron desenterrar neste sitio unha vintena de artefactos e numerosas mostras de restos orgánicos.
Este xacemento soterrado abre a posibilidade de efectuar unha datación moito máis segura que as que se fixeron ata agora no territorio da comarca de Lemos. A análise estratigráfica do terreo en que se localizaron estes obxectos podería proporcionar datos concretos sobre a idade do asentamento, o que non é posible cando os útiles paleolíticos aparecen na superficie, fóra do seu contexto orixinal.
Restos vexetais
Os investigadores tamén recolleron nesta escavacións numerosas mostras de madeira carbonizada que apareceron nos mesmos niveis que os artefactos tallados en pedra. A orixe deste material orgánico, de momento, non é fácil de precisar. «O que parece bastante seguro é que eses carbóns non proceden dun fogar, porque os restos de fogueiras teñen outra estrutura», comenta o que o arqueólogo Arturo de Lombera. «Na sondaxe non encontramos vestixios de cubetas escavadas na terra, que acompañan sempre os rastros de fogueira, así que é máis probable que estes carbóns procedan de incendios, por exemplo», agrega.
En todo caso, espérase que o estudio destes vestixios orgánicos no laboratorio proporcione datos de grande interese para a investigación. «Os carbóns poden axudarnos a saber se os artefactos están no seu contexto primitivo ou se o terreo foi removido en momentos posteriores, e tamén poden servir para reconstruír o medio ambiente da época», explica De Lombera. No lugar recolléronse ademais numerosas mostras de terra que poden conter pole fosililizado, un material que tamén pode ser moi útil para obter datos.

Tomado de: http://www.lavozdegalicia.es/lemos/2008/05/01/0003_6779850.htm

No hay comentarios:

Publicar un comentario